Kontrata

KONTRATA E PAKETËS TURISTIKE

Albanian Eagle Tours

Kjo kontratë rregullon marrëdhënien ndërmjet konsumatorit dhe organizatorit të paketës turistike Albanian Eagle Tours (në vijim “Organizatori”), në përputhje me legjislacionin shqiptar në fuqi dhe praktikat europiane për paketat turistike.

NENI 1

Përkufizimi i Paketës Turistike

Paketë turistike konsiderohet kombinimi i të paktën dy prej shërbimeve të mëposhtme të shitura me një çmim të përbashkët:

Transporti
Akomodimi
Shërbime të tjera turistike që përbëjnë një pjesë të rëndësishme të udhëtimit

Shërbimet mund të përfshijnë gjithashtu transferta, guida turistike, aktivitete kulturore, ekskursione dhe shërbime të tjera të lidhura me udhëtimin.

Paketat turistike organizohen nga Albanian Eagle Tours dhe realizohen në bashkëpunim me operatorë të pavarur të licencuar.

NENI 2

Rezervimi dhe Konfirmimi

Rezervimi konsiderohet i vlefshëm vetëm pasi konsumatori:

Pranon kushtet e kësaj kontrate
Kryen pagesën sipas kushteve të përcaktuara

Rezervimi konfirmohet nga Albanian Eagle Tours përmes emailit, dokumentit të rezervimit ose një konfirmimi tjetër të shkruar.

Specifikimet e paketës turistike, përfshirë itinerarin, shërbimet e përfshira dhe kushtet e udhëtimit, i komunikohen konsumatorit përpara konfirmimit përfundimtar.

Në rast se paketa turistike kërkon një numër minimal pjesëmarrësish dhe ky numër nuk arrihet, organizatori ka të drejtë të anulojë udhëtimin. Në këtë rast konsumatori njoftohet jo më vonë se 7 ditë para nisjes dhe i rimbursohet plotësisht shuma e paguar.

NENI 3

Pagesat

Minimumi 50% e çmimit total të paketës duhet të paguhet në momentin e rezervimit.

Pagesa e plotë duhet të kryhet jo më vonë se 14 ditë para nisjes së udhëtimit.

Në rastet kur paketa përfshin bileta avioni ose rezervime hotelesh me tarifa të pakthyeshme, organizatori mund të kërkojë pagesë të plotë në momentin e rezervimit.

Mospagimi i shumave në afatet e përcaktuara i jep të drejtë organizatorit të konsiderojë rezervimin të anuluar dhe të aplikojë penalitetet përkatëse.

3.5. Përpara kryerjes së rezervimit, konsumatorit i dërgohet me shkrim (email ose mjet tjetër i qëndrueshëm komunikimi) oferta e detajuar që përmban: çmimin total të paketës, kushtet e pagesës, kushtet e anulimit dhe çdo kusht tjetër të veçantë (p.sh. tarifa të pakthyeshme, depozita jo‑rimbursuese). Këto kushte të dakorduara me shkrim bëhen pjesë e kontratës dhe zbatohen mbi parashikimet e përgjithshme të këtij neni, për aq sa nuk bien ndesh me dispozitat detyruese të ligjit.

NENI 4

Çmimet

Çmimet e paketave turistike janë të shprehura në Euro dhe bazohen në kostot e kontraktuara nga organizatori për:

Transportin
Akomodimin
Taksat dhe tarifat aeroportuale
Kursin e këmbimit valutor
Kostot e karburantit

Çmimi mund të ndryshojë vetëm në rast ndryshimesh të detyrueshme në këto elemente.

Në rast se rritja e çmimit kalon 10% të çmimit total të paketës, konsumatori ka të drejtë të anulojë kontratën dhe të marrë rimbursim të plotë.

NENI 5

Anulimi nga Konsumatori

Në rast anulimi nga konsumatori aplikohen penalitetet e mëposhtme:

Anulim më shumë se 7 ditë para nisjes
Konsumatori paguan kostot reale të rezervimeve të kryera nga organizatori

Anulim nga 7 ditë deri në ditën e nisjes
Penaliteti mund të arrijë deri në 100% të çmimit të paketës nëse shërbimet janë të pakthyeshme

Në rastet kur paketa përfshin bileta avioni ose rezervime hotelesh të pakthyeshme, konsumatori është përgjegjës për kostot që organizatori ka paguar ndaj operatorëve të tretë.

5.1. Konsumatori ka të drejtë të anulojë paketën turistike në çdo kohë para nisjes, duke njoftuar organizatorin me shkrim (email ose mjet tjetër të verifikueshëm). Në këtë rast, organizatori ka të drejtë të zbatojë penalitete anulimi në përputhje me kushtet e dakorduara me shkrim në ofertën/konfirmimin e rezervimit.

5.2. Në mungesë të një marrëveshjeje specifike me shkrim mbi penalitetet, zbatohen këto rregulla të përgjithshme: Refund Policy

NENI 6

Ndryshimet nga Konsumatori

Ndryshimet e kërkuara nga konsumatori pas konfirmimit të rezervimit mund të realizohen vetëm nëse janë të mundshme teknikisht dhe operacionalisht.

Çdo ndryshim mund të shoqërohet me kosto shtesë që rrjedhin nga tarifat e kompanive ajrore, hoteleve ose operatorëve të tjerë.

NENI 7

Ndryshimet nga Organizatori

Në rast se pas nisjes një pjesë e rëndësishme e shërbimeve të kontraktuara nuk mund të realizohet për arsye objektive, organizatori do të përpiqet të ofrojë alternativa të përshtatshme pa kosto shtesë për konsumatorin.

Nëse vlera e shërbimit alternativ është më e ulët se ajo e parashikuar, diferenca i kthehet konsumatorit.

Nëse nuk është e mundur të ofrohet një zgjidhje alternative, konsumatori rimbursohet vetëm për pjesën e shërbimit të parealizuar.

NENI 8

Transferimi i Rezervimit

Konsumatori mund të transferojë rezervimin tek një person tjetër (kur kushtet e rezervimit e lejojnë ndryshimin) duke njoftuar organizatorin me shkrim jo më vonë se 4 ditë pune para nisjes.

Personi zëvendësues duhet të përmbushë të gjitha kushtet e udhëtimit dhe të paguajë çdo kosto shtesë që lidhet me transferimin e rezervimit.

NENI 9

Detyrimet e Konsumatorit

Konsumatori është përgjegjës për:

Pasaportën dhe dokumentet e udhëtimit
Vzat dhe dokumentacionin e nevojshëm për hyrjen në vendin e destinacionit
Respektimin e ligjeve dhe rregullave të vendit të vizituar

Albanian Eagle Tours nuk mban përgjegjësi në rast se autoritetet kufitare refuzojnë hyrjen e konsumatorit për shkak të mungesës së dokumentacionit të nevojshëm.

Neni 10 – Shërbimet e Ofruara nga Palë të Treta 

“10.1. Transporti ajror, akomodimi në hotel, transporti lokal dhe aktivitetet turistike mund të ofrohen nga operatorë të pavarur të licencuar (kompani ajrore, hotele, kompani transporti, operatorë ekskursionesh, etj.), me të cilët Albanian Eagle Tours ka marrëdhënie kontraktore.

10.2. Pavarësisht që shërbimet ofrohen nga palë të treta, sipas ligjit organizatori është përgjegjës ndaj konsumatorit për përmbushjen e duhur të shërbimeve të përfshira në paketë, përveç rasteve kur mungesa e përputhshmërisë i atribuohet:
a) vetë konsumatorit;
b) një pale të tretë që nuk është e përfshirë në ekzekutimin e shërbimeve të udhëtimit dhe mungesa nuk ka qenë e parashikueshme ose e shmangshme;
c) rrethanave të jashtëzakonshme dhe të paevitueshme (forcë madhore).

10.3. Në rast vonesash, anulimesh, overbooking ose probleme të ngjashme të shkaktuara nga operatorët e tretë, organizatori do të ndërmjetësojë në mënyrë aktive me këta operatorë për të gjetur një zgjidhje (ri‑planifikim, alternativa, rimbursim sipas rastit) dhe, aty ku detyrohet nga ligji, do të garantojë ndaj konsumatorit ulje çmimi dhe/ose kompensim, duke ruajtur të drejtën për regres ndaj operatorëve përkatës.

10.4. Për rastet që lidhen ekskluzivisht me humbjen ose dëmtimin e bagazhit gjatë transportit ajror, përgjegjësia rregullohet sipas konventave ndërkombëtare dhe rregullave të transportuesit; organizatori asiston konsumatorin në paraqitjen e kërkesave pranë transportuesit, por nuk merr përsipër përgjegjësi shtesë përtej asaj që parashikohet në ligjin e posaçëm.”

Neni 11 – Forca Madhore

11.1. Forcë madhore ose rrethana të jashtëzakonshme dhe të paevitueshme konsiderohen ato ngjarje të jashtë kontrollit të palës që thirret në të, pasojat e të cilave nuk mund të shmangen edhe nëse merren të gjitha masat e arsyeshme (p.sh. luftë, kriza të rënda sigurie, akte terroriste, fatkeqësi natyrore, epidemi/pandemi, masa të jashtëzakonshme të autoriteteve, greva të papritura, mbyllje kufijsh ose hapësirash ajrore).

11.2. Për aq sa lejon ligji, organizatori nuk është i detyruar të paguajë kompensim financiar shtesë për mungesën e përputhshmërisë kur ajo është pasojë e drejtpërdrejtë e forcës madhore. Megjithatë, konsumatori ruan të drejtën të kërkojë rimbursim ose ulje çmimi.

Në këto raste Albanian Eagle Tours do të bëjë përpjekje të arsyeshme për të ofruar alternativa të përshtatshme, por nuk është i detyruar të paguajë kompensim financiar për rrethana jashtë kontrollit të tij.

Neni 12 – Kufijtë e Përgjegjësisë

“12.1. Përveç rasteve të dëmeve personale (dëmtim shëndeti, lëndime trupore, vdekje) dhe rasteve të shkaktuara nga veprimet ose mosveprimet e qëllimshme ose neglizhenca e rëndë, përgjegjësia financiare totale e Albanian Eagle Tours për dëmet pasurore që rrjedhin nga mospërputhshmëria e paketës turistike nuk mund të tejkalojë shumën maksimale prej tre (3) herë çmimit total të paketës të paguar nga konsumatori, për sa kohë që ky kufizim është i lejuar nga legjislacioni në fuqi.

12.2. Ky kufizim nuk zbatohet për të drejtat e konsumatorit për ulje çmimi, rimbursim të shumave të paguara, apo çdo të drejtë tjetër të detyrueshme të parashikuar qartë nga legjislacioni shqiptar dhe ai i Bashkimit Europian për paketat turistike.

12.3. Asgjë në këtë kontratë nuk synon të kufizojë ose përjashtojë të drejtat minimale të konsumatorit të parashikuara me ligj; në rast mospërputhjeje midis kësaj kontrate dhe dispozitave detyruese ligjore, zbatohen këto të fundit.”

Neni 13 – Ankesa

“13.1. Konsumatori duhet të njoftojë organizatorin ose përfaqësuesin e tij për çdo problem ose mungesë përputhshmërie gjatë udhëtimit sa më shpejt që të jetë e arsyeshme, në mënyrë që organizatori të ketë mundësi ta zgjidhë atë në kohë.

13.2. Ankesat formale pas përfundimit të udhëtimit duhet të paraqiten me shkrim brenda një afati të arsyeshëm nga data e kthimit. 

13.3. Mosraportimi i problemit gjatë udhëtimit mund të heq mundësinë e organizatorit për të reaguar, apo rregulluar atë. Albanian Eagle Tours nuk mbahet përgjegjëse mos rregullim të problemit nëse nuk i jepet mundësia të bëj këtë, dhe ankesa vjen pas faktit.

NENI 14

Sigurimi

Rekomandohet që çdo udhëtar të pajiset me sigurim udhëtimi që mbulon:

Shpenzimet mjekësore
Anulimin e udhëtimit
Humbjen e bagazhit

Albanian Eagle Tours nuk mban përgjegjësi për kostot që lindin nga mungesa e sigurimit.

NENI 15

Mbrojtja e të Dhënave Personale

Të dhënat personale të konsumatorit përpunohen në përputhje me legjislacionin shqiptar për mbrojtjen e të dhënave personale dhe përdoren vetëm për realizimin e shërbimeve turistike.

NENI 16

Kufizimi i Përgjegjësisë së Organizatorit

Albanian Eagle Tours vepron si organizator i paketës turistike dhe ndërmjetës në koordinimin e shërbimeve të ofruara nga operatorë të pavarur të licencuar, përfshirë por pa u kufizuar në kompani ajrore, hotele, kompani transporti, operatorë ekskursionesh dhe ofrues të aktiviteteve turistike.

Përgjegjësia e Albanian Eagle Tours kufizohet vetëm në organizimin dhe koordinimin e shërbimeve të përfshira në paketën turistike.

Albanian Eagle Tours nuk mban përgjegjësi për mosrealizimin ose realizimin e paplotë të shërbimeve kur këto varen nga veprimet, mosveprimet ose vendimet e operatorëve të pavarur të përmendur më sipër.

Në këto raste çdo kërkesë për kompensim duhet të drejtohet drejtpërdrejt ndaj operatorit përkatës që ka ofruar shërbimin.

NENI 17

Juridiksioni

Mosmarrëveshjet ndërmjet palëve do të zgjidhen fillimisht me mirëkuptim.

Në rast se nuk arrihet marrëveshje, kompetente për zgjidhjen e mosmarrëveshjes është Gjykata e Shkallës së Parë Tiranë.